2Pe 1 | MED | STEP | Na Saimon Pita Jisas Kraist nga kongun wu, wote nombuⱡa rung wu ei ndi, mon ti rop, tᵾn nga Got, wote Etpa Ti Wu Jisas Kraist nga uⱡ kun kai mbila, tᵾn etpa, elim nga mondpa pili wamp mundrum ei mel, enim wamp mormin mbᵾ kᵾn, mon rop ngont.

2 Peter 1

Pita Ndi, Akil Tepa Mon Ti Ropa Ngurum

1 Na Saimon Pita Jisas Kraist nga kongun wu, wote nombuⱡa rung wu ei ndi, mon ti rop, tᵾn nga Got, wote Etpa Ti Wu Jisas Kraist nga uⱡ kun kai mbila, tᵾn etpa, elim nga mondpa pili wamp mundrum ei mel, enim wamp mormin mbᵾ kᵾn, mon rop ngont.

2 Tᵾn nga Nuim Jisas ei kᵾn, rᵾmp nduk, Got nga pilpa kungᵾndi ei, enim kᵾn tᵾk tek muⱡangina, elim nga wamp poⱡ ti uⱡ ei kᵾn, wamp moⱡpa kundi uⱡ mbᵾ, enim ngumba.

Got Ndi, Tᵾn Elim Nga Nimba Wi Ropa Titim

3 Got nga ronduⱡ ila, mondpa pili wamp kupa mbᵾ, muⱡeimᵾn nimba mel kai na, pilpa kungᵾndi mbᵾ tᵾn ngurum. Ei kᵾn, tᵾn nga uⱡ kun kai tila mon, tᵾn etpa tᵾpa, elim nga uⱡ eng nui mbila, muⱡᵾmin nimba itim wu ei, mondᵾp pᵾtmᵾn ei nga, nindpa itim. 4 Uⱡ ila, Got ndi, tᵾn memp kai mat nguimp, nimba mᵾi ropa pinditim mel mbᵾ ngorum. Ei kᵾn, ya mᵾi kona ila gem ngurum mel mbᵾ tᵾkᵾn. Wote, uⱡ kit mbᵾ, numan ngui nganggᵾkᵾn, Got nga kangambuⱡa kupa ralkᵾn, elim nga numan pilpa uⱡ etᵾm mbᵾ mel, itᵾmin nimba itim. 5 Wote, uⱡ kai mbᵾ etkᵾn, nim nga mondpa pili ei nga pol ila numan kai mbᵾ omba, wote uⱡ kai nga pol ila, pilpa kungᵾndi kai mbᵾ ngurum. 6 Ei nga, enim nga kᵾng ei nga numan ngorum uⱡ mbᵾ, mop map itᵾi! Mop map iti uⱡ ei tᵾk, enim nga mbun koma rui uⱡ ei kᵾn, kup indᵾi! Wote, Got nga uⱡ kun kai uⱡ ei tᵾk, mbon koma rui uⱡ ei kᵾn, kup indᵾi. 7 Wamp ᵾngᵾnᵾl kᵾn, mᵾn mundi uⱡ kai ei tᵾkᵾn, Got nga uⱡ kun kai uⱡ ei kᵾn, kup indᵾi! Wamp pᵾi numan ngui uⱡ ei tᵾk, wamp ᵾngᵾnᵾl kᵾn, mᵾn mundi uⱡ ei kᵾn, kup indᵾi! 8 Wote uⱡ mbᵾ, enim kᵾn pepa, ronduⱡ pum ndam, enim nga pilpa kungᵾndi ei, wei ti natᵾmba mon! Enim nga pilpa kungᵾndi ei, rᵾng mong ou ndupa romba. Enim ndi, tᵾn nga wu Nuim Jisas Kraist ei, enim pilik pora nduing. 9 Wote, wamp nam ti ndi, uⱡ kᵾⱡ elim kᵾn pi napᵾm ndam, mel roⱡ etpa tetᵾm mbᵾ, kandpa poⱡ ndui nandᵾmba. Ei mong ti, wamp na ni mel kapⱡa. Wote, elim nga uⱡ kit unt nga mbᵾ, pendpa kitim uⱡ ei, elim pilpa kun iti natᵾtᵾm. 10 Ni kᵾn, na nga wamp angmᵾn kᵾⱡ, Got ndi, enim wi ropa tᵾpa pora ndupa, enim tᵾp elim nga nimba to ropa titim. Ei kᵾn, enim ndi, kongun kᵾⱡ ronduⱡ mondᵾk eng ndam, enim uⱡ mbun ti ndi, enim nga mondpa pili, ei ropa mana ndui nandᵾmba. 11 Wote, enim uⱡ kᵾⱡ mel pep rong ndam, wote nombuⱡa mam ei, wei tiyangga kump kᵾm rukrᵾng mbun, tᵾn nga Nuim kᵾn, Etpa Ti Wu Jisas Kraist nga tᵾpa mumuk rui kona ila, rᵾk rᵾk molk mint ping.

12 Ei kᵾn, enim uⱡ it mbᵾ nga pᵾtmin ei, wote ik kupa ei, pilik tᵾk pol ila anggilik, wote na ndi, ik kupa mbo indᵾt ei, pilik tᵾk, enim akup mormin. Ei nga, wote na ndi, ui mbila rᵾk rᵾk enim nga numan orunga rop rut ndup nimp ku. 13 Na pᵾnt ei, uⱡ kai ei, na kᵾng kᵾⱡ kont mont ei kᵾn, enim rᵾk rᵾk rop rut ndup, numan orunga rop rut ndup nimp mint. 14 Na pᵾnt ei, ui nondpa tila, na nga kᵾng kᵾⱡ wak ruimp. Ei kᵾn, tᵾn nga wu Nuim Jisas Kraist ei ndi, na kundpa nitim. 15 Ei nga, na ndi, kongun ronduⱡ mundᵾp etᵾp, enim kundᵾp namba pilik molk kᵾn, wote na kunt ei kᵾn, enim ndi, ik nᵾnt mbᵾ, ui mbila pilik mint muⱡeing.

Tᵾn Ndi, Got Nga Uⱡ Eng Nui Ei, Kraist Kᵾn Titim Kᵾndᵾrmᵾn

16 Tᵾn ndi, ik kep nombun ik timan mat mim etpᵾn, tᵾn nga Nuim Jisas Kraist elim ronduⱡ ei, mepa yant omba ei nga, enim kundᵾp ni nᵾndᵾtmᵾn mon. Tᵾn nga mong raⱡ ila, elim nga ronduⱡ pi uⱡ kᵾndᵾrmᵾn ei mel, kun kundᵾp nitmin. 17 Got Tipam ei ndi, elim ni mbi paka rondpa mbi ou ngurum. Got elim rᵾpᵾndi pol rukᵾr orunga ila moⱡpa mana omba, Jisas kᵾn nimba mel, “Ya ei, na nga kangᵾm mendpᵾⱡ ei, na numan minal ngor. Ei nga, na elim kᵾn numan minal ngont,” nitim. 18 Wote tᵾn kᵾn, elim kᵾn komnga wingti ila moⱡmina, Got nga ik ei, wi muⱡ kona ila mana oⱡnga pitmᵾn. 19 Ei kᵾn, tᵾn ndi, painui wu kᵾⱡ nga ik ei, kupa nᵾmp pilpᵾn, ronduⱡ mondᵾp pᵾtmᵾn. Ei kᵾn, enim ndi, wu kᵾⱡ nga ik ei, ronduⱡ mundᵾk ambᵾrmᵾn ei, ik kupa. Nambuⱡ emel, painui wu kᵾⱡ nga ik ei, kiya mel kona rumbᵾⱡ morum ila rᵾⱡang mba kᵾn, wote kona ranggrᵾm. Ei kᵾn, Mᵾkᵾlmᵾ Mipil petᵾm ei mel, enim nga numan orunga ropa rᵾt ndurum. 20 Ni kᵾn, enim unt pilik kun itᵾi! Wote enim ndi, enim nga numan orunga, uⱡ mat iti nᵾtᵾi! Ei nga, wote enim ndi, painui wu mbᵾ nga Buk Wingti ila, ik puⱡ petᵾm ei mel, ni nᵾnmin mon. Ei nambuⱡ emel, unt kor nga wamp ti ndi, painui ik ei nga, elim nga numan ila ni nᵾndᵾtᵾm mon! Wote, Muⱡnga Wingti elim ndi, wamp numan orunga ropa rᵾt nduⱡnga nᵾtᵾng ik ei, Got elim ndi, wamp mbᵾ ngurum.